O Concello de Boiro está a levar a cabo as obras para a construción de beirarrúas e carril bici nun treito da avenida da Constitución. O alcalde, José Ramón Romero, e o concelleiro de Urbanismo e Obras, Luís Ruiz, visitaron este martes 3 de marzo o lugar para coñecer o estado de execución das obras.
As actuacións estanse a levar a cabo no tramo comprendido entre a avenida de Compostela e a rúa Salvador Allende e contemplan “a construción de beirarrúas de soleira de formigón e baldosa hidráulica nunha zona na que non existen na actualidade e con abundante tránsito peonil procedente dos centros de ensino situados na avenida de Compostela”, explicaron.
As obras contemplan, ademais da execución de beirarrúa, a dotación dun carril bici que conecta co xa existente na rúa Salvador Allende e que chega á praia de Barraña. Con esta actuación executarase tamén unha glorieta na intersección entre a avenida da Constitución e a rúa Salvador Allende para “mellorar a seguridade viaria e garantir unha maior fluidez do tráfico rodado”.
As actuacións complétanse coa execución das canalizacións de saneamento, abastecemento de auga e electricidade así como a execución dos pasos elevados e o marcado viario. Esta obra, que ascende aos 199.240,61 euros, conta co financiamento da Deputación da Coruña mediante o POS+.
