O Concello de Boiro vén de adquirir dous novos desfibriladores semiautomáticos para instalacións municipais. Coa adquisición destes dous novos aparellos, o Concello de Boiro conta xa con 16 desfibriladores instalados en diversas instalacións municipais. O concelleiro, Roberto Lojo, supervisou este xoves 5 de marzo a instalación dos mesmos.
Engadiu que “todos os aparellos propiedade do Concello de Boiro están dados de alta no 061 e dotados con todo o material necesario para facer unha reanimación en caso dunha parada cardiorespiratoria, tanto en adultos como en nenos”.
Sinalou tamén que os distintos dispositivos están situados en inmóbeis municipais con gran afluencia de persoas e lugares onde se desenvolven tamén probas e competicións como son as instalacións deportivas.
O Concello de Boiro vai levar agora a cabo cursos de reciclaxe para o persoal municipal que conta con formación en RCP (Reanimación Cardio-Pulmonar) e manexo dos desfibriladores, así como formación para novos traballadores municipais para seguir ampliando o numero de persoas con esta formación. Trátase de cursos teórico-prácticos impartidos por persoal cualificado e que certifica aos participantes que contan con esa formación específica.
