A Coordinadora para ou Estudo dous Mamíferos Mariños (CEMMA) informou da morte do golfiño solitario chamado Ladiña por mor dun accidente coa hélice dun barco.
Segundo informa nun comunicado, a coordinadora rexistrou o falecemento do cetáceo asentado na ría de Arousa tras ver que a súa nai, Ladeira, foi albiscada estes últimos días sen a súa cría no porto de Marín.
A CEMMA recorda que Ladeira e Ladiña, unha femia pequena, foron detectadas por vez primeira en maio de 2024 na contorna da Guarda para logo trasladarse ao porto de Baiona, onde se asentaron durante todo o verán dese ano.
A partir da primavera do 2025, foron movéndose cara o norte nas rías sendo detectadas durante o verán na ría de Arousa, percorrendo todos os portos do interior, de Rianxo a Cambados. Ao final de ano foron detectadas na zona do Grove e xa a principios de 2026 na ría de Pontevedra.
Ladeira sen Ladiña
Dende hai unhas semanas Ladeira foi observada ela soa. Así o explican dende a CEMMA: “Parecía moi estraño porque, o seu cachorro nunca se separaba dela. En diferentes días foi observada co seu típico comportamento de parada en superficie, pero en solitario. De seguida saltaron as alarmas e revisáronse os varamentos en zonas inmediatas e tempo antes. Dende xaneiro houbo dous arroaces varados na ría, un en Praceres, Pontevedra e outro en Ancoradoiro, Bueu, mais ningún dos dous coincidía coas características de Ladiña. O sábado día 28 de febreiro, o número de coordinación de encallamentos de cetáceos recibiu un aviso de varamento fronte ao porto de Campelo, Poio. Tratábase dun arroaz duns dous metros de lonxitude e moi descomposto. Tampouco parecía Ladiña, sobre todo por tratarse dun corpo tan mutilado e deteriorado. Alí se desprazou unha unidade móbil da CEMMA comprobando que era un arroaz efectivamente mutilado, con grandes cortes causados por unha hélice que lle causaron gravísimas feridas, cortes e traumatismos provocando a morte instantánea do exemplar. Polo característico perfil da aleta dorsal de Ladiña, seguida case ao día durante ano e medio, comprobouse que efectivamente tratábase do seu corpo”.
A CEMMA lembra que moitas veces é a curiosidade que os arroaces senten polas embarcacións e as actividades humanas o que as leva a vivir situacións de claro risco: “A curiosidade pode levalos a un fatal desenlace, igual que lle ocorreu ao arroaz Confi en xuño do ano 2025 cando foi detectado morto con graves traumatismos causados por unha hélice.
Axuda a Ladeira
Neste momento Ladeira móvese soa polas inmediacións do porto de Marín e ocasionalmente segue a manter o comportamento de descanso en superficie. A CEMMA recorda a importancia de que se remitan datos sobre a súa presenza para levar seguimento e previr situacións complicadas ou molestias. Prégase que se utilice o teléfono da Unidade Móbil da CEMMA (686989008) para trasladar información, avisos, imaxes ou consultas sobre a presenza de Ladeira nas inmediacións do porto de Marín.
