O director xeral de Pesca, Acuicultura e Innovación Tecnolóxica, Isaac Rosón, reuniuse en Santiago de Compostela con representantes da Organización de Produtores de Mexillón de Galicia (Opmega) no marco da rolda de contactos que mantén cos distintos axentes socioeconómicos do ámbito marítimo-pesqueiro.
Durante o encontro, o responsable autonómico confirmou que a Consellería do Mar convocará este mes a Comisión do Mexillón na súa sesión ordinaria, co obxectivo de continuar traballando de maneira coordinada co sector, garantir a viabilidade das explotacións e impulsar novas iniciativas de promoción e valorización do mexillón galego.
Segundo trasladou Rosón, a activación deste órgano permitirá reforzar o diálogo coa cadea mar-industria e avanzar en accións que contribúan a consolidar a presenza do produto nos mercados nacionais e internacionais.
A miticultura constitúe un sector estratéxico en Galicia, xerando miles de empregos directos e indirectos, especialmente nas provincias da Coruña e Pontevedra, onde se concentran máis de 3.300 bateas. Ademais do seu impacto laboral, o mexillón representa un piar fundamental nas exportacións agroalimentarias galegas, cun peso crecente na proxección exterior da comunidade.
