A conselleira do Mar, Marta Villaverde, reuniuse este luns 9 de marzo co alcalde de Porto do Son, José Luis Oujo, no marco da escoita activa que mantén co sector e cos representantes institucionais das rexións costeiras, co obxectivo de seguir tecendo alianzas que revertan no impulso da actividade marítimo-pesqueira e, en paralelo, no desenvolvemento socioeconómico dos concellos do litoral galego.
No transcurso do encontro, conselleira e rexedor fixeron un repaso dos últimos investimentos acometidos co apoio da Xunta, entre os que destaca a mellora do dique de abrigo e ampliación da capacidade de atraque no peirao de Portosín. A esta actuación, dotada con máis de 2,1 millóns de euros, e que se atopa en execución nestes momentos, a Administración autonómica, a través do Fondo Europeo Marítimo, de Pesca e de Acuicultura (FEMPA), achega o 70 % do importe total; é dicir, case 1,8 millóns.
O proxecto comprende a construción dunha plataforma flotante de formigón para 17 embarcacións pesqueiras e un dique de 120 para o seu refuxio. Deste xeito, o novo molle situarase na zona da nave de redes e acollerá 13 barcos de artes menores e 4 de cerco. Para mellorar o acceso e manobra das mesmas, acometerase a dragaxe de 400 metros cúbicos de rocha. Tamén abordaron as obras de acondicionamento da nave de redeiras de Porto do Son, coa finalidade de mellorar as condicións de traballo das profesionais.
