Este venres 27 de marzo, ás 19:30 h, o Edificio Casino de Noia acollerá unha xornada centrada na figura de Isaac Díaz Pardo, unha das referencias da cultura galega. A persoa encargada impartir a charla será Felipe Senén, historiador da Cultura Galega. Desenvolverase baixo o epígrafe Isaac Díaz Pardo. Vida, obra e espolio. Organiza a Asociación de Amigos de Fefiñáns en colaboración coa Concellería de Cultura de Noia.
Felipe Senén López Gómez (O Carballiño, 1948) é un prestixioso historiador, arqueólogo e museólogo galego, recoñecido polo seu inmenso labor de divulgación e defensa do patrimonio cultural de Galicia.
A charla será un complemento á mostra Isaac Díaz Pardo: Luz e compromiso, que pon en valor a figura de Isaac Díaz Pardo e que pode contemplarse estes días no Casino de Noia (comisariada por Maka Arca).
A mostra poderase ver até o 10 de abril, de luns a venres en horario de 11.00 a 14.00 horas.
A mostra reúne paneis que percorren a vida e a traxectoria de Isaac Díaz Pardo, creador de Sargadelos, desde o seu nacemento ata a súa morte, achegando ao público unha visión completa do seu importante e inxente legado artístico, cultural e intelectual.
Isaac Díaz Pardo (1920-2012) é unha figura clave para entendermos a cultura galega contemporánea. Marcado pola morte do seu pai a mans dos sublevados no ano 1936 e pola súa relación cos galegos exiliados en América, dedicou toda a súa vida á recuperación da memoria en Galicia a través das súas empresas.
Isaac Díaz Pardo nace en Santiago de Compostela o 22 de agosto do 1920 e morre na Coruña o 5 de xaneiro do 2011. Fillo de Camilo Díaz Baliño, famoso escenógrafo, pintor e cartelista, o obradoiro de seu pai foi lugar de reunión por onde pasaron tres xeracións de políticos, intelectuais e artistas, entre eles Castelao e Luis Seoane.
Isaac Díaz Pardo foi empresario cultural, deseñador industrial, escritor, editor, promotor e mecenas de proxectos. Como escritor deixou ensaios sobre arte, economía, historia, ademais de poesía e teatro.
