Este 29 de marzo volven a Outes as andainas do programa municipal Coñece o Noso Patrimonio, Rutas de Primavera 2026, conxunto de itinerarios destinados a mostrar e reivindicar os tesouros ambientais, culturais, patrimoniais e paisaxísticos do termo municipal e das súas parroquias. O programa, organizado polo Concello de Outes, inclúe esta tempada 7 rutas culturais guiadas e dirixidas por un experto local. As persoas interesadas en formalizar a súa inscrición poden achegar os seus datos o luns previo a cada andaina cubrindo o formulario que atoparán escaneando o código QR do cartel ou na páxina web municipal.
Este luns 23 de marzo o Concello abren as inscricións para a primeira andaina: Historia do Freixo e Rego do Rial. Desenvolverase este 29 de marzo e terá unha distancia de 10 quilómetros con punto de partida dende o Centro Náutico do Freixo.
O 12 de abril está prevista a segunda andaina: De Mirás a Carelo polo Cristo de Baneo, con saída dende a capela do Socorro de Mirás e unha distancia de 7,5 quilómetros.
O 26 de abril celebrarase o roteiro Camiñando cara a orixe do concello de Outes, con saída dende a Eira de Carme, en Brión de Arriba, e unha distancia de 9 quilómetros.
O 10 de maio está programada a ruta Historia apícola no Val do Donas, con saída na capela de San Adrián e un percorrido de 7 quilómetros.
O 24 de maio celebrarase o roteiro Historia ás beiras do río Bendimón, con saída dende a Igrexa de Roo e unha distancia de 7 quilómetros.
O 7 de xuño está prevista a andaina San Miguel de Valadares e montes de Lantarou, con saída na Igrexa de Valadares e unha distancia de 11 quilómetros.
O ciclo rematará o 28 de xuño con Torre dos Mouros e Fervenzas de San Paio, con saída na Igrexa de San Lourenzo e un percorrido de 6,5 quilómetros.
As citas darán comezo ás 9.00 horas e as andainas terán dificultade media. As prazas serán limitadas, de 50 persoas por andaina, agás as rutas da Torre dos Mouros e as Fervenzas de San Paio que serán de 25.
