Nos últimos días, as brigadas municipais do Concello de Muros levaron a cabo labores de mantemento nas zonas verdes de Esteiro, actuando no paseo fluvial do río Riomaior, nas áreas recreativas da Alameda e do Artón, e en Parameán.
Estes traballos centráronse principalmente na roza e coidado da vexetación, que medra con forza nesta época tras as chuvias e a humidade acumulada, e na poda de árbores.
Trátase, en palabras do Concello, de “actuacións necesarias para manter os espazos naturais en boas condicións para o uso diario da veciñanza”.
A concelleira de Obras e Servizos, Laura Rivadeneira sinala: “Estamos a actuar no mantemento diario destes espazos, que é fundamental para o seu uso e conservación. Ao mesmo tempo, somos conscientes das necesidades existentes e levamos tempo traballando en solucións máis amplas, que requiren tramitación e financiamento, pero que son unha prioridade para nós”.
