A nova glorieta da avenida da Constitución, proxectada no marco das obras que se están a executar para a dotación de beirarrúas e carril bici, contará cunha obra do escultor local Tucho Abalo. O corazón da ría é o nome deste proxecto que representa o mexillón.
Dende o Concello lembran que “Boiro é un dos principais produtores da ría de Arousa e o sector bateeiro centra gran parte do noso tecido económico”.
Esta obra escultórica, realizada a base de ferro e materiais reciclados, constará de dezaseis elementos individuais en forma de cuncha de mexillón colocados en forma de flor, xunto cunha peza central de dous mexillóns fusionados en forma de mexillón simbolizando unha letra B.
Para a elaboración das pezas que compoñen a escultura recolleranse materiais recollidos nas praias. Para iso, este sábado 7 de marzo farase, na praia de Barraña, unha convocatoria para a recollida de residuos nas praias que empregar para a creación da escultura. O punto de encontro para todas aquelas persoas que se queiran sumar a esta recollida será o Edificio das Colonias de Praia Xardín ás 11.00 horas.
