Axentes da Garda Civil detiveron a un home en Muros como presunto autor dun delito contra a saúde pública e desmantelaron un punto de venda de substancias estupefacientes que operaba nunha vivenda da localidade.
A operación foi levada a cabo por efectivos do posto da Garda Civil de Muros en colaboración co posto de Boiro, e contou tamén coa participación da Policía Local de Muros.
A investigación iniciouse tras recibir información procedente da colaboración cidadá que alertaba da posible existencia dun punto de venda de droga na zona. Unha vez analizados os datos recollidos, os axentes lograron localizar o piso no que presuntamente se distribuían as substancias.
Tras obter o correspondente mandado de entrada e rexistro por parte da autoridade xudicial, os axentes accederon á vivenda, onde localizaron diversas substancias estupefacientes que estaban a ser manipuladas para a súa distribución en doses individuais.
Durante o rexistro tamén se interviñeron útiles para o pesado, preparación e envasado das drogas, ademais de 320 euros en moeda fraccionada. Os axentes atoparon igualmente distintos obxectos que poderían estar relacionados con delitos contra a propiedade e que, segundo explica a Garda Civil no seu comunicado, poderían ter sido utilizados como medio de pagamento polas substancias. A investigación continúa aberta e non se descartan novas detencións relacionadas con este caso.
