O Concello da Pobra do Caramiñal impulsará un proxecto de emerxencia para actuar no paseo marítimo dos Areos, co obxectivo de consolidar a cimentación do muro e garantir a seguridade das persoas, así como preservar unha infraestrutura esencial para a vila.
Tras o seguimento técnico realizado nas últimas semanas, detectouse un deterioro significativo nun tramo aproximado de 90 metros lineais. Desde o goberno local consideran “imprescindible” actuar con carácter urxente para reforzar a estrutura e evitar un posible colapso.
O alcalde, José Carlos Vidal, subliñou que a decisión responde á necesidade de “evitar o colapso da infraestrutura, o que podería causar graves danos materiais e persoais”. O rexedor recoñeceu que as competencias poderían corresponder a outras administracións, pero defendeu que “non podemos deixar pasar máis tempo; o primordial é a seguridade dos veciños e veciñas, polo que é necesario actuar coa máxima celeridade posible”.
Un eventual derrubamento afectaría gravemente á estrada DP-6703, clave para a circulación peonil e viaria da vila, así como ás edificacións e establecementos da contorna.
Recalce da cimentación por bataches
A intervención prevista consistirá no recalce da cimentación mediante bataches, penetrando 80 centímetros na rasante actual da area e procedendo ao recheo con formigón. Este sistema xa foi empregado con éxito noutro tramo do paseo, polo que permitirá estabilizar temporalmente a estrutura e reducir o risco inmediato.
Danos agravados polos temporais
Os informes técnicos sinalan que a acción continuada dos temporais, das mareas vivas e das correntes mariñas provocou o lavado progresivo da cimentación do muro, descalzándoa e xerando unha perda significativa de estabilidade no tramo afectado.
Os fortes temporais rexistrados este inverno aceleraron esta patoloxía. Ademais, as previsións apuntan á chegada de novos episodios adversos que poderían coincidir coas mareas vivas de marzo —as máis intensas do ano—, o que incrementaría o risco.
Nestes momentos, a zona afectada permanece acordoada pola Policía Local. Desde o Concello fan un chamamento á responsabilidade cidadá e ao respecto das indicacións de seguridade, insistindo en que a prioridade absoluta é protexer á veciñanza mentres se executan as actuacións necesarias.
