O Concello de Boiro celebra o 8M coas mulleres do social como protagonistas dun manifesto institucional no que participaron as mulleres de Amicos, BarbanTEA e Aloumiña que reivindicaron os seus dereitos e ratificaron o seu compromiso por unha sociedade mais igualitaria e máis xusta para as mulleres con discapacidade, con autismo ou aquelas que viven no rural.
Unha data de homenaxe pero tamén para a reivindicación do camiño que aínda queda por diante para a igualdade real e na que se presentou o vídeo Mulleres transformadoras onte e hoxe realizado polas mulleres dos obradoiros de memoria da Cruz Vermella de Boiro e o grupo de voluntariado Turbina.
Ambar presentou unha proposta escénica que, a través dos corpos e o movemento, busca visibilizar a diversidade de experiencias que atravesan ás mulleres na nosa sociedade e que contou tamén coa colaboración de CenPliés cunha intervención artística que representa historias de loita, resiliencia e esperanza.
O alcalde, José Ramón Romero, foi o encargado de pechar un acto que “nos convida a reflexionar e tamén a renovar o noso compromiso, o do Concello de Boiro e o de todos os boirenses coa igualdade real entre homes e mulleres”.
Máis actividades do 8M en Boiro
O sábado 7 de marzo ás 16.00h terá lugar no Centro Social de Boiro a conversa coa psicóloga investigadora en Grupo de Medicamento Xenómica (GMX-USC) Muller e autismo: por que acontece o desequilibrio de xénero no diagnóstico?.
No mesmo lugar ás 17.00 horas celebrarase un obradoiro práctico e íntimo organizado por Barbantea: Mulleres e diagnóstico tardío con Ingrid Mosquera Grande. E xa ás 20.00 horas no Centro Social de Abanqueiro teatro musical coa actuación Non estamos tolas.
A programación prolóngase durante todo o mes de marzo coas actividades do programa Muller e Saúde, un programa de actividades que se fan ao longo do ano con propósitos de temáticas moi distintas para “chegar a distintos sectores da poboación”, afirmou o concelleiro Raúl Treus na presentación da axenda (celebrada a semana pasada), engadindo que as sesións comezan o 4 de marzo con Ciberviolencia e control dixital, que impartirá a Cruz Vermella de Boiro ás 16.00 horas no Centro Social de Boiro.
O venres 13 de marzo ás 16.00 horas celebrarase no Centro Social de Abanqueiro o relatorio Complementos na alimentación, impartido por Fernando Casal Couto, butricionista da Escola Galega de Saúde (SERGAS).
O mércores 18 ás 16.30 horas terá lugar no Centro Social de Boiro un taller sobre Sobrecarga dos coidados, orientado a persoas coidadoras, que estará impartido pola Asociación Alar Galicia.
O venres 27 de marzo a Asociación Andaina Pro Saúde Mental impartirá un obradoiro sobre Xestión emocional no duelo que será no Centro Social de Boiro ás 16.30 horas e o mesmo día pero no Centro Social de Abanqueiro ás 16.00 horas celebrarase un obradoiro de emocións e técnicas de relaxación impartido por Merceces Urbiola Ituarte da Escola Galega de Saúde (SERGAS).
Todas as sesións prácticas e as charlas son gratuítas pero precisan inscrición previa no enderezo electrónico cim@boiro.org e no teléfono 669 582 674. Máis información na web municipal.
