O Concello de Lousame celebrou este sábado unha mesa redonda titulada “A muller en Europa”, na que participaron voluntarias europeas, sénior e xuvenís do municipio e na que se puxo de manifesto a necesidade de maior rapidez da xustiza á hora de protexer os dereitos das mulleres, especialmente en casos de violencia de xénero.
A actividade, enmarcada na programación do Día Internacional da Muller, contou coa participación de once mulleres que simbolicamente ocuparon os postos dos concelleiros no salón de plenos. O alcalde, Esteban Ares, destacou durante a apertura que a imaxe representaba “o que podería chegar a ser unha corporación municipal formada integramente por mulleres”.
Na mesa participaron voluntarias europeas como Ogsanna Yeritsyan e Zhenya Yordanova, así como integrantes do voluntariado xuvenil e sénior do municipio. Ambas compartiron as súas experiencias e os avances en materia de igualdade nos seus países, aínda que coincidiron en sinalar que moitas veces a resposta das autoridades xudiciais non chega a tempo ante situacións de violencia machista, o que pode debilitar a confianza das vítimas no sistema.
Unha reflexión que tamén compartiron as voluntarias locais, que subliñaron a importancia de actuar con rapidez para garantir a protección das mulleres. Pola súa banda, as participantes máis novas advertiron ademais dun repunte de actitudes machistas entre a mocidade, polo que reclamaron reforzar a educación en igualdade tanto nas escolas como no ámbito familiar.
Durante o encontro tamén se puxo en valor o papel do voluntariado no municipio, tanto no apoio ás persoas maiores que viven soas como na promoción de actividades sociais e culturais. A concelleira de Igualdade, Silvia Agrafojo, actuou ademais como tradutora para facilitar a participación das voluntarias internacionais.
A xornada completouse cun obradoiro de lactación materna impartido por Alicia Conde e coa inauguración da exposición “As Mulleres na Biblia”, cedida pola Fundación Museo de Artes de Ribeira e que poderá visitarse ata o 7 de maio na Casa da Cultura. A mostra inclúe 30 calcografías dos artistas flamencos Jan Collaert e Karel van Mallery.
A programación especial continuará este domingo coa representación teatral “Todas temos a mesma historia”, unha obra inspirada en textos de Dario Fo e Franca Rame que invita a reflexionar sobre a evolución da realidade das mulleres ao longo das últimas décadas.
