Na mañá deste luns 23 de marzo o Viveiro de Empresas do Concello de Porto do Son acolleu unha xuntanza entre o alumnado e docentes da Formación de Restaurante e Bar, impulsada por Ambar, asociación inclusiva do Barbanza, e a tenente de alcalde do Concello de Porto do Son, María José Maroñas.
Durante o evento tamén estiveron presentes Milagros Rey, presidenta de Ambar; Daniel Tojo, orientador laboral, e Jessica Estévez, técnica de emprego de Ambar. Nesta xornada, o alumnado e o seu formador, Pablo Pouso, compartiron a súa motivación e a ilusión por este novo curso no que se formarán para realizar funcións de auxiliar de camareiro/a, axudante de bar, auxiliar de colectividades e empregados/as de establecementos de restauración.
Esta formación está co-financiada pola Fundación ONCE e polo Fondo Social Europeo (FSE) a través da Convocatoria de Axudas Económicas para a Selección de Operacións para o Reforzo da Empregabilidade para Persoas con Discapacidade “Uno a Uno” no marco do Programa FSE+ de Inclusión Social (PIN) – Ano 2025-2026.
