A conselleira de Política Social e Igualdade, Fabiola García, visitou esta semana a parcela de Cruxeiras preto do parque periurbano de San Roque. onde a Xunta ten previsto construír a nova residencia pública de maiores de Ribeira. No percorrido tamén participaron a alcaldesa, María Sampedro, e un técnico municipal, quen supervisaron a idoneidade dos terreos e comprobaron que cumpren cos requisitos necesarios para acoller o proxecto comprometido polo Goberno galego.
O terreo, de titularidade municipal, será cedido á Administración autonómica mediante un convenio que se formalizará nos vindeiros días. Con esta cesión, o Concello de Ribeira e a Xunta dan un novo paso cara á materialización dun servizo que busca reforzar a atención ás persoas maiores na comarca do Barbanza.
Desde hoxe, a Consellería comezará a redactar as bases técnicas necesarias para licitar o deseño do proxecto, co obxectivo de acelerar os prazos e iniciar canto antes as obras. O Executivo autonómico subliña que con esta actuación cumpre o compromiso asumido con Ribeira de dotar o municipio dunha residencia pública moderna e integrada no entorno.
A parcela escollida conta con amplas zonas verdes e atópase preto do parque de San Roque, un dos espazos naturais máis emblemáticos da cidade. Tamén dispón dunha boa comunicación co núcleo urbano e ofrece vistas ao mar, un valor engadido para o futuro centro residencial.
