A Consellería do Mar acordou coas tres federacións provinciais de confrarías de pescadores e coa Federación Galega de Confrarías de Pescadores o novo baremo que rexerá a valoración das solicitudes para obter o permiso de explotación na modalidade de marisqueo a pé.
O obxectivo deste sistema, que actualiza o anterior, é garantir un procedemento transparente e obxectivo baseado en criterios profesionais, sociais e formativos, permitindo ordenar as solicitudes en función dos méritos das persoas aspirantes.
Con esta medida, a Xunta dá resposta a unha demanda histórica das confrarías, reforzando a colaboración co sector e facilitando o acceso á actividade marisqueira, especialmente a persoas en situación de desemprego e con formación específica. A iniciativa busca tamén favorecer a remuda xeracional e contribuír á xestión sustentable dos recursos mariños. Na actualidade, Galicia conta con 2.967 permisos de explotación a pé, dos que o 90 % corresponden a mulleres.
Criterios de valoración
O acordo foi acadado por consenso nunha reunión na que participaron a directora xeral de Desenvolvemento Pesqueiro, Ángeles V. Suárez, e as directoras territoriais de Mar da Coruña e Vigo, María Cancelo e Elena Suárez, respectivamente.
O baremo establece como primeiro criterio a situación como demandante de emprego, que deberá acreditarse durante un período mínimo de seis meses inmediatamente anteriores á convocatoria, xa sexa como solicitante ou como demandante de mellora.
En segundo lugar, valorarase a formación e cualificación das persoas aspirantes, incluíndo tanto a titulación académica como as actividades formativas e habilidades profesionais relacionadas co sector.
Entre as materias que se terán en conta figuran a xestión sustentable dos recursos mariños, os ecosistemas mariños e a economía azul, o marisqueo e a acuicultura, a organización do sector, a lexislación pesqueira, o emprendemento, a comercialización de produtos, a seguridade alimentaria, a prevención de riscos ou as habilidades sociais e de xestión.
Tamén se valorarán especificamente as competencias profesionais vinculadas ao marisqueo.
Ademais, o baremo terá en conta o empadroamento das persoas solicitantes en concellos do ámbito das confrarías ou entidades titulares do plan de xestión correspondente, así como en municipios costeiros limítrofes.
Este sistema permitirá acceder á actividade extractiva tanto nas zonas de libre marisqueo como nas áreas sometidas a autorización, de acordo coa normativa vixente.
