O Centro Social de Boiro converteuse este venres 13 de marzo nun espazo de aprendizaxe e reflexión coa celebración das xornadas de xestión emocional, unha iniciativa impulsada pola Asociación Ambar para as persoas con diversidade funcional.
A sesión, que tivo lugar na sala Leña Verde do dito CS de Boiro, estivo centrada na xestión emocional e o autocoidado. A psicóloga da asociación, Lola Prego, foi a encargada de impartir o obradoiro, proporcionando ás persoas asistentes claves prácticas e estratexias para mellorar a calidade de vida e o equilibrio psicolóxico no día a día.
Dende a Asociación Ambar destacaron a gran acollida desta actividade, subliñando que a creación destes espazos de encontro é “máis necesaria ca nunca”. A xornada buscou apoderar ás participantes no manexo das súas propias emocións.
Esta actividade enmárcase dentro dun conxunto de xornadas dirixidas a mulleres que se levará a cabo en varios concellos da contorna. Faise grazas ao financiamento da Xunta de Galicia (Consellería de Política Social e Igualdade), co co-financiamento de fondos europeos. A vindeira xornada será no Centro de Interpretación dos Castros de Baroña de Porto do Son e tratará sobre recursos e trámites na diversidade e dependencia. A Asociación Ambar reafirma así o seu compromiso ca inclusión e o benestar integral do colectivo de persoas con diversidade funcional na comarca da Barbanza, agradecendo a todas as persoas que sumaron a súa presenza nesta xornada de crecemento compartido.
