O Concello da Pobra do Caramiñal presentou na mañá deste 10 de marzo o programa Xoga ao Baile Deportivo, unha iniciativa posta en marcha polo Taller Alecrín en colaboración coa Concellería de Cultura e a ANPA do Colexio Banda Seca.
A actividade terá lugar no CEP Plurilingüe Salustiano Rey Eiras entre este mércores 11 de marzo e o día 25 deste mesmo mes.
O obxectivo desta iniciativa é achegar á rapazada distintas modalidades de baile deportivo, así como fomentar esta disciplina como actividade física e artística e mellorar, á súa vez, a condición física das persoas participantes. Tal e como destacou a concelleira de Cultura, Patricia Lojo, durante a presentación, “é unha maneira de achegar aos rapaces e rapazas a esta modalidade artística ao mesmo tempo que se promoven hábitos saudábeis”.
Pola súa parte, o director de Taller Alecrín, Francisco Muñiz, salientou a importancia de “ofrecer experiencias educativas que van máis aló da aula e que contribúen ao benestar do alumnado”.
O programa abrangue tes unidades de tres sesións cada unha a desenvolver nas aulas de Educación Física como parte da programación da materia en relación ca expresión corporal e o ritmo. O obxectivo principal é dar a coñecer as modalidades de baile en parella tanto Estándar como Latino que compoñen o programa de competición de Baile Deportivo.
Valse Inglés e Valse Vienés serán os ritmos que se desenvolverán na primeira sesión desta primeira unidade, mentres Rumba e Cha-cha-chá serán os da segunda, para rematar nunha terceira sesión dedicada xa á propia competición. Nesta fase os participantes demostrarán as destrezas aprendidas.
As persoas interesadas en recibir máis información poden chamar ao 698 150 432.
