A Área de Cultura do Concello de Rianxo informou do inminente inicio do Programa de Primavera 2026, que arrinca o vindeiro 27 de marzo cun concerto da pianista boirense Elsa Muñiz. Este concerto será ás 20.30 horas na Sala Arcos Moldes (teatro), do Centro Sociocultural-Auditorio de Rianxo.
O Ciclo de Primavera vén ser unha novidade dentro da oferta cultural que desenvolve o Concello de Rianxo. Nace coa intención de “promover e difundir a música de expresión culta entre aquelas persoas pouco inclinadas ou coñecedoras do xénero, contribuíndo ademais á educación cultural e á ocupación valiosa do tempo de lecer dos veciños e veciñas de Rianxo e do público en xeral”.
A pianista e compositora boirense Elsa Muñiz está a presentar estes días con diferentes concertos o seu novo álbum, o libro-disco New Beginnings, un álbum profundamente persoal que inaugura unha nova etapa na vida e na carreira artística da pianistas do Barbanza. Segundo lembra ela mesma, este libro-disco enmárcase dentro da súa proposta de pianotelling, un concepto propio co que combina a música de piano co relato emocional de experiencias reais, transformando vivencias persoais en pezas sonoras cargadas de significado.
New Beginnings, o libro-disco de Elsa Muñiz, está dispoñíbel en plataformas dixitais e en formato físico na web da propia compositora.
