O Concello de Noia acolleu este venres 13 de marzo o acto de inauguración da exposición Isaac Díaz Pardo: Luz e compromiso, unha mostra que pon en valor a figura dun dos grandes referentes da cultura galega, Isaac Díaz Pardo.
A inauguración (no Edificio Casino de Noia) contou coa participación de Chelo Martínez, concelleira de Cultura, e de Maka Arca, curadora da exposición, quen convidou ás persoas asistentes a percorrer a mostra e descubrir, a través das súas explicacións, a relevancia de Isaac Díaz Pardo na historia cultural de Galicia.
A mostra poderase ver até o 10 de abril, de luns a venres en horario de 11.00 a 14.00 horas.
A mostra reúne paneis que percorren a vida e a traxectoria de Isaac Díaz Pardo, creador de Sargadelos, desde o seu nacemento ata a súa morte, achegando ao público unha visión completa do seu importante e inxente legado artístico, cultural e intelectual.
A exposición está comisariada pola profesora Maka Arca, coa colaboración da profesora Ana M. Mosquera.
Isaac Díaz Pardo (1920-2012) é unha figura clave para entendermos a cultura galega contemporánea. Marcado pola morte do seu pai a mans dos sublevados no ano 1936 e pola súa relación cos galegos exiliados en América, dedicou toda a súa vida á recuperación da memoria en Galicia a través das súas empresas.
Isaac Díaz Pardo nace en Santiago de Compostela o 22 de agosto do 1920 e morre na Coruña o 5 de xaneiro do 2011. Fillo de Camilo Díaz Baliño, famoso escenógrafo, pintor e cartelista, o obradoiro de seu pai foi lugar de reunión por onde pasaron tres xeracións de políticos, intelectuais e artistas, entre eles Castelao e Luis Seoane.
Isaac Díaz Pardo foi empresario cultural, deseñador industrial, escritor, editor, promotor e mecenas de proxectos. Como escritor deixou ensaios sobre arte, economía, historia, ademais de poesía e teatro.
