A entrega dos premios aos mellores atletas galegos do ano, que recaeron en Ana Peleteiro e Adrián Ben.
A Gala Anual do Atletismo Galego celebrouse este venres en Santiago de Compostela, nun acto que congregou a deportistas, adestradores, clubs, xuíces e representantes institucionais co obxectivo de recoñecer os éxitos acadados ao longo de 2025.
O evento foi inaugurado polo presidente da Federación Galega de Atletismo, Iván Sanmartín, quen destacou o esforzo e compromiso de todo o colectivo atlético galego.
Durante a gala puxéronse en valor os logros das seleccións galegas nas súas distintas categorías, así como os resultados dos medallistas en campionatos de España, os novos récords galegos absolutos e o traballo desenvolvido por clubs, adestradores e xuíces ao longo da tempada.
A velada contou tamén cun momento especialmente emotivo, no que se rendeu homenaxe ás persoas vinculadas ao atletismo galego falecidas no último ano, nun xesto que evidenciou a unión e os valores desta comunidade deportiva.
O punto culminante chegou coa entrega dos premios aos mellores atletas galegos do ano, que recaeron en Ana Peleteiro e Adrián Ben, en recoñecemento ás súas destacadas traxectorias e resultados.
O acto foi clausurado polo secretario xeral para o Deporte da Xunta de Galicia, Roberto Fernández, quen subliñou o papel do deporte como motor de cohesión social e exemplo de superación.
