A deputada de Cultura da Deputación da Coruña, Natividade González, presentou este luns 23 de marzo no Museo do Mar de Muros o 2.º Foro de Traballo da Rede Cultural. O evento, centrado na relación entre cultura e mocidade, celebrarase este 26 de marzo ás 16.00 horas no Auditorio do Centro Cultural e Xuvenil de Muros. No acto participaron tamén a alcaldesa de Muros, María Lago, e o coordinador das xornadas formativas da Rede Cultural, Roberto Pascual.
Durante a súa intervención, Natividade González destacou que as xornadas da Rede Cultural “son moito máis que un encontro puntual”, xa que funcionan como espazos de traballo “moi pegados á realidade, cun carácter práctico, pero tamén reflexivo”, nos que se combina a formación co intercambio de ideas. A deputada subliñou que estas iniciativas nacen co obxectivo de “mellorar a calidade do servizo cultural público que ofrecemos á cidadanía” e parten da idea de que “a cultura é un traballo compartido”. Amais, incidiu na importancia da implicación de todos os axentes culturais, desde a creación ata a distribución e o propio público, para avanzar nun modelo máis sólido e participativo. Segundo explicou, “o que se procura con estes encontros é seguir fortalecendo un servizo público esencial para a cohesión social, incorporando ademais unha ollada transversal na que a accesibilidade e a inclusión estean sempre presentes”.
A deputada puxo o foco no tema central desta segunda edición do foro, a relación entre a mocidade e a cultura, e convidou a repensar os enfoques actuais. “Falamos moito de que á xente nova lle custa achegarse á cultura, pero quizais o que temos que facer é preguntarnos como nos achegamos nós a elas e a eles”, afirmou.
O foro desenvolverase cunha dinámica participativa conducida por Carlota Mosquera, que converterá a xornada nun parlamento da mocidade no que mozos e mozas poderán expresar ideas, inquedanzas e propostas en diálogo directo con profesionais e institucións.
Pola súa banda, a alcaldesa de Muros, María Lago, agradeceulle á Deputación da Coruña que contase co municipio para acoller esta xornada e salientou a importancia de implicar á xente nova na vida cultural.
A rexedora indicou que “a mocidade é un sector da poboación que moitas veces se nos escapa, por causa de que non se está a contar con ela”, e destacou o traballo realizado desde o Concello e os centros de ensino para dar a coñecer a iniciativa e fomentar a participación. “Agardamos que desta experiencia saia unha programación cultural máis atractiva para a xente moza e, sobre todo, que teña en conta a súa opinión, que sexan eles e elas quen nos axuden a nós a decidir que actividades se poden programar ao longo do ano”, afirmou.
O coordinador das xornadas formativas da Rede Cultural, Roberto Pascual, explicou que este foro está concibido como unha xornada práctica orientada a atender as necesidades dos profesionais do sector, así como cuestións estratéxicas para mellorar o funcionamento da Rede Cultural da Deputación, que dá servizo a 93 concellos e mobiliza máis de dous millóns de euros.
Pascual subliñou que o obxectivo vai máis alá de ofrecer programación, xa que unha Rede Cultural viva debe atender tamén as dinámicas de mediación e os públicos que aínda non se senten interpelados polos espazos culturais. Sobre o encontro de Muros, destacou a vitalidade do movemento asociativo desta localidade e reivindicou o papel da cultura promovida desde os concellos como espazo de socialización e intercambio de experiencias.
