A Casa dos Veciños de Cespón (Cespón, Boiro, Parque de San Roque) vai acoller este venres 20 de marzo unha charla coa que contribuír a incrementar na sociedade o coñecemento científico (e útil) sobre trastornos TEA (espectro autista) ou TDAH (hiperactividade e déficit de atención).
A sesión, que se desenvolve baixo o epígrafe Xenética, TEA e TDAH, será ás 19.00 horas, e virá da man do doutor e profesor de Medicina Legal da USC Anxo Carracedo, e da doutora María Tubío Fungueirño, experta en neurociencia.
Organiza BarbanTEA no marco do ciclo divulgativo TARDEA.
Segundo lembran dende a organización da charla, o doutor Carracedo é unha das figuras máis recoñecidas no ámbito da xenética a nivel mundial, cunha traxectoria científica de enorme impacto e unha ampla experiencia na investigación biomédica. A súa participación supón unha oportunidade única para achegar á veciñanza coñecemento rigoroso, actualizado e accesíbel sobre o papel da xenética no TEA e no TDAH.
Acompañarao tamén a doutora María Tubío Fungueiriño, doutora en Neurociencia e Psicoloxía Clínica, achegando a perspectiva clínica e psicolóxica a esta conversa.
Un espazo aberto para aprender, preguntar e comprender mellor como a xenética inflúe nos trastornos do neurodesenvolvemento, nun formato próximo e participativo.
Entrada libre ata completar aforo.
