Nun dos nosos xornais viña este luns a noticia da “benvida social” para un neno de Ames, do que se di de seguido que foi o primeiro en ter alí un “bautizo civil”.
Xa en canto vin eses termos, comecei a me preguntar: Que é o que lle pode conceder a nosa sociedade a aquel neno que na foto aparece no regazo dunha muller: o ter acceso á gardería? Desde logo, non coido que precisara da benvida do Concello para participar como bebé no xantar que ía seguir a aquel acto social ou para acollelo na gardería: o único que o bebé pode facer na situación en que se atopa é polo momento seguir recibindo o leite materno ou o biberón que lle poidan procurar os que o coidan. No resto, quédanlle moitos anos para poder aportar o seu voto e mais aínda para estar preparado e facer unha oposición para ter en diante un posto de traballo que lle reporte os beneficios necesarios para a vida.
Hai algo que o xornal poñía en titulares, asegundo semella, para que a xente puidera entender de que “benvida social” se trataba. Trátase, tal como se indica de seguido, dun “bautismo civil”, o primeiro do Concello de Ames. Afeito como un está a considerar o bautismo como un dos sacramentos da Igrexa católica, pensei en primeiro lugar no que ese “bautismo” (?) tivera de sacramento, ao ser este “un signo sensible polo que se transmite a graza de Deus”. Tamén pensei no que, desde o punto de vista terreo, pode ser ese “bautismo”: se sería que o Sr. Alcalde o puidera agasallar cun baño nunha bañeira ou con outro tipo de regalos para darlle a benvida.
A palabra “bautismo” ven do grego “baptidso”, que significa “mergullar”. A razón dese nome está en que, nas súas orixes, o bautismo realizábase por inmersión, como fixo Xoán o Bautista con Xesús no río Xordán, e como se facía na Igrexa ao longo de moitos séculos, metendo ao que se bautizaba na piscina bautismal. Queríase dese xeito significar a limpeza interior que acadaba o catecúmeno, simbolizada na acción purificadora da auga sobre o corpo do bautizando. Co paso do tempo, e buscando a sinxeleza, optouse por facer o bautismo por aspersión, botando auga sobre a cabeza do bautizando, mentres se invocaba á Santísima Trindade, en cuxo nome se bautizaba ao catecúmeno, para que pasara a ser membro da Igrexa de Cristo.
Na foto que se nos ofrece dese acontecemento “social”, ademais do Sr. Alcalde, aparecen na sala outras vinte persoas, e mais tres asentos libres. Mirei ben, a ver se había algunha bañeira para o “bautizo”, pero non vin trazas dela… En calquera caso pedinlle a Deus polo neno, e polos seus pais e demais acompañantes, desexándolles que a nosa sociedade lles dea a benvida, de xeito que todos colaboremos na formación dunha comunidade ben levada, que realice o camiño da vida coa esperanza de atopar, mais alá dela, unha felicidade sen fin.
