A Asociación para a Defensa do Patrimonio Cultural Galego vén de publicar un contido nas redes sociais no que alerta sobre o estado de abandono no que se atopa a Muralla de Aguiño, a histórica construción de pedra a xunta seca que dá nome a unha praia e unha zona concreta da parroquia de gran importancia paisaxística e ambiental e que, tamén, indican dende a asociación, “forma parte da nosa memoria colectiva, da nosa paisaxe e da nosa identidade como pobo”.
E engaden: “Hoxe ese patrimonio está en perigo real. O abandono, a falta de mantemento e a inacción están a provocar o seu progresivo derrubamento. Cada pedra que cae é unha perda irreparábel”. Para a entidade, “non estamos ante un vestixio desaparecido nin ante un recordo simbólico: estamos ante un ben que aínda pode e debe ser salvado, por iso desde o respecto institucional pero coa máxima firmeza, esiximos ás administracións competentes que actúen de maneira inmediata”.
A asociación lembra que “as leis de protección do patrimonio existen para ser aplicadas, e este é un caso claro no que cómpre exercelas sen máis demora”, e que “a Muralla de Aguiño non pode quedar á mercé do tempo nin da desidia”.
Conclúen sinalando que “protexer, conservar e restaurar é unha obriga legal, pero tamén un deber moral co noso legado e coas xeracións futuras”.
A Muralla de Aguiño é unha construción de gran extensión de pedra sen morteiro (a xunta seca), situada moi preto do mar.
