A mobilización en defensa da Sanidade Pública volveu facerse escoitar este xoves en Ribeira, onde a veciñanza continúa reclamando a cobertura das prazas vacantes nos centros de saúde do municipio, tanto no núcleo urbano como en Aguiño.
Durante a concentración, o portavoz do BNG en Ribeira, Luís Pérez Barral, denunciou que, malia que “a presión social conseguiu que se cubriran parte das prazas”, na actualidade segue faltando unha profesional en Aguiño e tres en Ribeira: un médico de familia, un pediatra e unha matrona.
Barral cualificou a situación de “insostible” e atribuíuna ás políticas sanitarias do Partido Popular na Xunta. Segundo sinalou, entre 2020 e 2025 “deriváronse case 1.700 millóns de euros á sanidade privada, cartos que poderían ter servido para reforzar o persoal e reducir as listas de agarda”.
O portavoz nacionalista criticou tamén o que considera un “desprezo á Atención Primaria” por parte da Consellaría de Sanidade, lembrando que dos 91 MIR que remataron en 2025 a especialidade de Medicina Familiar e Comunitaria, o 65 % optaron por marchar. “É o resultado da precariedade e do maltrato continuado aos profesionais”, afirmou.
Así mesmo, recriminou a actitude da señora Sampedro por “priorizar os intereses do PP mentres a veciñanza segue mobilizada para garantir un servizo básico”. Ao seu xuízo, “cando a cidadanía ten que saír á rúa para defender a sanidade pública é porque quen goberna está fallando”.
Desde o BNG quixeron trasladar o seu recoñecemento ás persoas que participan nas concentracións semanais e reiteraron o seu compromiso coa defensa dunha sanidade pública “forte, con persoal suficiente e atención de calidade”. A mobilización continuará mentres non se cubran as prazas pendentes e se garanta unha atención digna para toda a veciñanza.
