Un motorista resultou ferido este mediodía en Rianxo tras colidir contra un coche no quilómetro 9 da estrada AC-305, á altura da parroquia de Asados. Segundo a información facilitada polos servizos de emerxencia, o home chegou a permanecer inconsciente despois do impacto.
Foi evacuado polos servizos sanitarios no helicóptero medicalizado con base en Santiago.
Foi o propio persoal de Urxencias Sanitarias de Galicia-061 o que alertou ao 112 Galicia deste accidente, pasadas as 13:20 horas: un coche e unha moto acababan de chocar no quilómetro 9 da AC-305, á altura da parroquia de Asados (Rianxo). Segundo explicaron os alertadores, o motorista permanecía inconsciente.
Nese momento, desde Urxencias Sanitarias de Galicia-061 comunicaron que estaban a mobilizar o seu helicóptero medicalizado con base en Santiago, que aterrou no punto e que finalmente trasladaría ao ferido ao hospital.
No operativo tamén participaron a Garda Civil de Tráfico, a Policía Local de Rianxo e os servizos de mantemento da estrada.
