O grupo cidadán UCIN Boiro achegou un comunicado no que expresa a súa preocupación pola “recente vaga de roubos, atracos e actos de violencia en Boiro, unha situación que xera medo entre a veciñanza”.
Miguel Piqueras, coordinador de UCIN Boiro, afirma: “Non se pode aceptar que os nosos veciños non poidan camiñar tranquilos polas rúas”, engadindo que “a Policía Local non ten unha presenza efectiva durante a noite e o alcalde segue sen responder ás alertas da cidadanía”.
Estes feitos, di, poñen de manifesto “a necesidade urxente de reforzar a vixilancia e a prevención”, polo que dende UCIN esixen ao Concello “presenza policial nocturna diaria e visíbel os sete días da semana, medidas preventivas eficaces que protexan aos veciños, aos comercios e aos espazos públicos, coordinación real entre a Policía Local e a Garda Civil para anticiparse aos delitos, e atención inmediata ás alertas da cidadanía”.
Piqueras subliña: “A seguridade non pode limitarse a reaccionar despois dos delitos. Cada veciño merece sentir confianza e protección no seu fogar, nas súas rúas e no seu comercio”.
