A Plataforma Stop Deshaucios Barbanza vén de compartir outro caso moi preocupante dunha familia en risco de ser desaloxada do seu fogar e de ficar sen solución habitacional. En concreto, a plataforma indica que se trata “dun núcleo familiar vulnerábel de Ribeira que ten fixado para o 13 de marzo o seu desafiuzamento, por orde da Xulgado Nº1 de Ribeira e a instancias dunha denuncia de execución hipotecaria da entidade financeira galega Abanca”.
E engaden: “Dende a plataforma entendemos que a entidade Abanca debe someterse ao Código de Boas Prácticas así como aos Reais Decretos e demais disposicións legais de aplicación para tratar de negociar un alugueiro social e non deixar na rúa a unha familia, entre eles a unha pensionista con escasos ingresos, que por motivos empresariais e de varios negocios con perdas, e con diversas propiedades embargadas, agora vese en risco de quedar sen a vivenda habitual”.
Desde Stop Desafiuzamentos Barbanza faise un chamamento aos responsábeis de Abanca para que “teñan a necesaria sensibilidade, empatía así como de boa e humana xestión financeira para negociar un alugueiro social e que a familia se poida quedar na vivenda”.
