O pleno da Corporación de Rois aprobou este 5 de febreiro participar no Plan provincial de cooperación ás obras e servizos de competencia municipal (Plan único de concellos), o POS+ 2026, da Deputación da Coruña, no que lle corresponde unha asignación total de 656.062,91 euros. O punto contou co voto favorábel de PP e BNG e coa abstención do PSdeG.
A proposta do equipo de goberno popular, aprobada pola Corporación, reserva 409.319,78 para gasto corrente, e outros 246.743,13 euros para “a execución de investimentos financeiramente sostíbeis”.
Os proxectos de obras incluídos no POS+ deste ano con o acondicionamento da vía en Vilar de Abade e varios na Casa do Vento (Ermedelo). O terceiro dos proxectos contempla a mellora de accesos ao núcleo de Quintáns e, o cuarto, á primeira fase da pavimentación do núcleo de Socastro.
Adicionalmente, e dentro do Plan complementario, o Concello de Rois inclúe outros tres proxectos de obras cun orzamento total de 244.946,61. En concreto figura a segunda fase da pavimentación de Socastro, o acondicionamento e humanización da praza de Oín e a súa contorna, e o afirmado e acondicionamento da estrada que vai de Penavide a Asneiros.
Aínda que votou a favor “porque as obras son moi necesarias”, o BNG vota en falta unha planificación anticipada para a execución de obras e incluír outros proxectos, como o saneamento. O alcalde, Ramón Tojo, respondeulle se van facendo “pouco a pouco” melloras en pistas nas diferentes aldeas e que os abastecementos e saneamentos “ímolos incluíndo en diferentes plans”, se ben aclarou que Socastro xa conta con saneamento.
O PSdeG optou por absterse porque non participou na elaboración do POS, se ben aclarou que as obras “son moi necesarias”.
