O Entroido de Rois reuniu esta fin de semana a máis de 350 persoas nun colorido desfile que encheu de música, humor e creatividade as rúas do municipio. Comparsas, carrozas, tríos, parellas e participantes individuais competiron por un dos premios ofrecidos polo Concello, que repartiu máis de 2.000 euros entre as distintas categorías.
O desfile, encabezado pola comparsa local O rebaño da Galiña Azul de Rois, contou coa participación de grupos chegados tamén desde concellos veciños como Padrón, Pontecesures, Valga e Porto do Son, que quixeron sumarse á celebración.
A comitiva percorreu o centro de Rois ata o pavillón municipal, onde se celebrou o concurso e a entrega de premios. A xornada festiva concluíu cunha gran merenda popular, organizada coa colaboración das asociacións veciñais e colectivos locais, que convidaron aos asistentes a degustar produtos típicos do Entroido. A música do dúo Stylo puxo o broche final a unha festa marcada pola participación e o bo ambiente.
