Este venres 6 de febreiro o Centro Cultural Lustres Rivas de Santiago acollerá ás 20.00 horas a inauguración dunha nova exposición de pintura a cargo de Maite Bouzo.
O acto é de entrada libre e de balde e estará presidido pola alcaldesa María Sampedro Fernandez acompañada da Concelleira de Cultura, Ana Barreiro e o programador de exposicións e xestor cultural municipal Unai González.
A exposición estará ata finais de mes e poderá visitarse de luns a venres mañá e tarde e sábados pola mañá de xeito gratuíto.
A exposición Escolma dunha vida, en palabras de Maite Bouzo, “pretende ser unha mostra de pintura que recolle obras realizadas ao longo da miña vida, comprendendo pezas de moitos anos diferentes e incluíndo pinturas antigas dos meus inicios na miña cidade natal de Ourense, outras correspondentes á miña época en Vigo e máis recentemente, as elaboradas aquí nesta fermosa terra nosa de natureza salvaxe e amplos horizontes”.
