Continúan en Muros as tarefas de limpeza e mantemento no centro histórico, impulsadas polo Concello. A Brigada de Obras do Concello de Muros, coa colaboración do GES, está a realizar tarefas de limpeza no casco de Muros. Este pasado venres, a brigada continuou coa limpeza no centro histórico na rúa Príncipe, na rúa do Río e na praza do Cristo.
O GES fixo as labores de limpeza na contorna da Colexiata da Virxe do Camiño.
O obxectivo destes traballos é garantir a seguridade e limpeza dos enlousados e empedrados cubertos de capa vexetal por mor do exceso de humidade: “Este inverno tan chuvioso fixo que se acumule verdello na pedra, polo que para evitar o risco de caídas estase a facer a limpeza”, informou o Concello, engadindo que os traballos concentráronse tamén, a semana pasada, nas rúas Don Diego, Florida, Canavala, Xixón, Anxo, Rosal, A Saúde ou a praza de Pescadería.
