O auditorio da Casa da Cultura de Portosín acolle este venres 13 de febreiro a xornada final de resultados do proxecto GELFISH, en horario de mañá: de 10.00 a 13.00 horas.
O proxecto GELFISH céntrase na valorización e aproveitamento integral do peixe azul. Na xornada presentaranse os resultados acadados, análises medioambientais e tecno-económicas, e os potenciais usos gastronómicos dos oleoxeles de peixe baixo a marca Azul de Portosín.
Será, en palabras da organización, “un encontro para coñecer innovación, sustentabilidade e futuro no sector pesqueiro e alimentario”. Haberá varias presentacións sobre os froitos obtidos a través deste proxecto e tamén unha mesa redonda sobre as oportunidades que abren os oleoxeles.
A inscrición para asistir é xornada é obrigatoria e pode facerse a través do QR do cartaz.
A iniciativa GELFISH é un proxecto do Instituto de Investigaciones Marinas – Consejo Superior de Investigaciones Científicas (IIM-CSIC) coa colaboración da Universidade de Santiago e de entidades como a Confraría de Portosín (marca Azul de Portosín). Céntrase na valorización do aceite de peixe mediante a obtención de oleoxeles estabilizados con diferentes hidrocoloides, algúns deles de orixe mariña (como o quitosano) e que poden ser obtidos en procesos de valorización integrados coa produción dos propios oleoxeles e outros produtos de alto valor. A produción deste tipo de compostos permite, ademais de incrementar o valor do aceite, a conservación dos seus beneficios nutricionais nun novo formato máis axeitado para o seu emprego na industria conserveira, promovendo unha nova alternativa para facer o mellor uso posíbel dos recursos mariños. Todo iso co fin último de incentivar e promover o incremento dos niveis de cumprimento da obriga de desembarco (OD) mediante o aproveitamento da biomasa que antes da PPC era desbotada. Ademais, inclúe unha análise tecno-económica e ambiental do proceso, cuantificando a circularidade da valorización de descartes mediante o uso de indicadores combinados, así como os potenciais beneficios para as frotas artesanais consideradas.
