O Concello de Porto do Son presentou este xoves 26 de febreiro unha ampla programación cultural, educativa e deportiva, no marco deste 8M, Día Internacional da Muller. Así, durante todo o mes de marzo levaranse a cabo un compendio de iniciativas en prol da igualdade de oportunidades e do fomento da vida saudábel.
O punto de partida será o 6 de marzo cando darán comezo as xornadas de muller e deporte. Ese venres, 6 de marzo, terá lugar a actividade Aquacircuit & Aquagym masterclass no complexo deportivo da Piscina Municipal e aberto a toda a veciñanza. A partir das 9:45 h poderase realizar aquacircuit e ás 11:00 h, aquagym. As persoas interesadas poderán inscribirse en pisicinaportodoson@gmail.com ou no 604 051 189.
O domingo 8 de marzo continúan as xornadas de muller e deporte coa actividade Crosstraining no Pavillón Polideportivo David Vidal de Portosín e aberto a toda a veciñanza. Haberá unha primeira sesión as 10:30 h e unha segunda ás 11:30 h. As persoas interesadas poderán inscribirse en pisicinaportodoson@gmail.com ou no 604 051 189.
O mesmo día, 8M, celebrarase a charla Xornaleiras e emprendedoras na Galicia marítima de antano no Club de Xubilados de Porto do Son e aberta a toda a veciñanza. Dará comezo ás 12:00 h e contará co relatorio de José Manuel Vázquez Lijó.
Para o luns, 23 de marzo, levarase a cabo o curso para mulleres Comunicación e manexo do conflito no viveiro de empresas municipal, de 16:00 a 20:00 h. Esta formación vai dirixida a mulleres maiores de 18 anos e poderanse inscribir ata o 6 de marzo a través do enderezo electrónico maria.santos.lemina@portodoson.gal. As prazas son limitadas.
Ademais, durante todo o mes de marzo os centros educativos do municipio participarán na Campaña educativa da Xunta de Galicia de fomento de igualdade coa familia de Os Bolechas, onde serán repartidos cadernos a todos os/as escolares.
Tamén, durante marzo e abril o Concello súmase á campaña da Xunta de Galicia Agresión OFF. Eu digo non á violencia Sexual que está previsto celebrarase no IES Porto do Son e que vai dirixida a todo o alumnado de secundaria e bacherelato.
Trala presentación do programa, o alcalde Luis Oujo destacou que “confiamos en que esta programación volva a ter unha gran acollida, con actividades que buscan fomentar a reflexión crítica, promover valores de igualdade, respecto e liberdade desde a infancia ata a idade adulta”.
E engadiu: “Animamos a toda a veciñanza a participar, un ano máis, neste completo programa do 8M, co obxectivo de promover a igualdade e un estilo de vida saudable, sen deixar atrás a ninguén e afondando no diálogo e no autocoidado como eixes da igualdade e da visibilidade”.
