Padrón acollerá este sábado 7 de febreiro a celebración da XXIII Padrón 10K, unha edición que “pasará á historia ao acadar un récord absoluto de participación, con 1.653 persoas inscritas entre todas as categorías”, informou o Concello, engadindo que “o éxito de convocatoria reflicte o crecente prestixio dunha proba con circuítos homologados pola Real Federación Española de Atletismo (RFEA)”.
Un total de 882 corredores/as tomarán a saída na distancia reina de 10 quilómetros, mentres que a proba de 5K contará con 401 atletas. De xeito moi especial, o Concello destaca a gran resposta das categorías de base, con 370 nenos e nenas inscritos, o que asegura o futuro deste deporte na comarca.
A actividade deportiva centrarase no Campo do Souto, lugar de saída e meta, cos seguintes horarios:
16.00 h: probas escolares (categorías dende pitufos ata sub14).
16.50 h: saída da proba 5K.
17.40 h: saída da proba absoluta 10K.
A entrega de trofeos e premios en metálico (que inclúen 250€ para os gañadores absolutos e premios especiais para atletas locais) terá lugar no Auditorio Municipal ás 19.15 horas.
Para garantir a seguridade de atletas e público, a Policía Local e o servizo de Protección Civil de Padrón coordinarán un dispositivo que implicará cortes ao tráfico rodado entre as 15.30 e as 18.30 horas.
As rúas afectadas polo percorrido serán: Campo do Souto, Travesía Feira, accesos, paseo e carril bici da desembocadura do río Sar, rúa Agro do Medio, Praza da Leña e rúa Castelao. Así mesmo, quedará restrinxido o estacionamento nas zonas delimitadas do Campo do Souto e da Praza da Leña.
O Concello de Padrón agradece de antemán “a colaboración e comprensión da cidadanía polas molestias ocasionadas e anima á veciñanza a gozar desta nova edición da Padrón 10K, que volverá converter as rúas da vila nunha auténtica festa do deporte”, informou o Consistorio.
