O vehículo VIDOC da Policía Nacional estará este 10 de febreiro no concello de Outes, en horario de 9.00 a 12.30 horas, co obxectivo de facilitar a renovación do DNI/pasaporte e evitar que a veciñanza teña que trasladarse ás oficinas da Policía Nacional máis próximas ao concello. O vehículo VIDOC fará 8 visitas a Outes ao longo do ano 2026. A primeira destas datas será o vindeiro 10 de febreiro.
Os Vehículos Integrais de Documentación da Policía Nacional (VIDOC) están a percorrer 27 concellos coruñeses que carecen de comisaría, ademais do Centro Penitenciario de Teixeiro, para prestar servizos de documentación exclusivos delas, como a renovación e expedición dos DNI e dos pasaportes.
Grazas a estas unidades móbiles as persoas que pidan cita neste servizo poderán ter listo calquera dos dous documentos en apenas dez minutos, mellorando tamén os tempos de resposta das anteriores unidades, que precisaban de tres días para a xestión: un día para a pegada dactilar, outro para a impresión nunha comisaría e un terceiro para a entrega.
Estes novos vehículos, que forman parte do Plan de Identidade Dixital da Dirección Xeral da Policía Nacional financiado con cargo aos fondos do Plan de Recuperación, teñen capacidade para actualizar os certificados dixitais do DNI, xa que contan cun Punto de Actualización de Documentación (PAD).
