O portavoz socialista no Concello de Ribeira, Francisco Suárez-Puerta, defendeu no pleno da Corporación deste 23 de febreiro o voto favorábel do PSdeG á proposta para a adquisición de Cerqueira, pero acusou á alcaldesa de “construír un falso relato político e de actuar con inacción na tramitación efectiva do expediente”.
O voceiro socialista criticou á rexedora polas declaracións nas que dixo “que non había nada xestionado”, e sostivo que “esa versión queda desmontada pola tramitación previa realizada durante o anterior goberno”. Segundo dixo, “para facer posíbel a adquisición era necesario modificar o PSTD, precisamente porque os fondos europeos solicitados inicialmente polo PP estaban previstos para outra finalidade”, lembrando no pleno que “non era a intención do PP adquirir Cerqueira a través de fondos europeos”. Suárez-Puerta recordou que “esa modificación foi aprobada en xullo de 2025”, co PP na oposición e co tripartito gobernando Ribeira, e engadiu que “o prezo pactado coa parte vendedora xa quedara fixado en 500.000 euros, cunha rebaixa de 200.000 euros respecto das cantidades iniciais, nunha negociación iniciada o 19 de decembro de 2023”.
O PSdeG dixo ademais “que o expediente xa contaba cunha tramitación administrativa ampla e avanzada, con solicitude e recepción de notas simples, incoación de expedientes, valoración do inmóbel, certificacións catastrais, achega de documentación para a desafectación do dominio público, informes de Secretaría e DACI emitidas por distintos departamentos municipais”. O portavoz socialista tamén salientou a sinatura dun protocolo de actuacións na propia nave de Cerqueira, coa presenza do secretario xeral e da parte vendedora, e respondeu ás descualificacións do PP afirmando: “Imaxino que ambos son contrarios o PP, porque senón non ten ningún sentido que se prestaran a acudir ese día”. Fronte a ese traballo previo, o PSdeG considera que “o actual goberno non achegou novidades substanciais nin no expediente nin no prezo, xa que este goberno non negociou nada”.
Para os socialistas, a proposta levada a pleno “non incorporaba cambios de fondo”, porque, dixo, “a necesidade de autorización plenaria xa figuraba nos informes de Secretaría previos á moción de censura, polo que a situación se resume nunha idea clara: nada novo”.
Insistiu en que a votación podería terse producido antes “porque o expediente está basicamente igual e o prezo xa estaba acordado”. E engadiu: “Podemos votar agora, podíamos votar o mes pasado ou podemos votar o mes que vén mentres se cumpran os prazos dos fondos”.
O PSdeG votou a favor por, segundo comentou Suárez-Puerta, “coherencia co traballo desenvolvido desde o inicio para habilitar os fondos e facer posíbel a compra de Cerqueira”, e esixiu ao Executivo local que “abandone a propaganda e avance nas tramitacións pendentes”.
