O coworking de Boiro -Lab Barbanza– acollía onte mércores, 18 de febreiro, un encontro entre o alcalde, José Ramón Romero, e o concelleiro de Comercio, Formación e Emprego, Roberto Lojo, e os coworkers do espazo. Esta xornada serviu para dar a benvida ás novas incorporacións ao Lab Barbanza e planificar as accións a desenvolver durante o ano 2026.
Na xuntanza presentáronse os dous novos proxectos emprendedores que están a desenvolver a súa actividade no Lab Barbanza, trátase dunha empresa de elaboración de aceite de oliva artesanal e outra que presta soporte administrativo para empresas e autónomos.
Asemade, aproveitouse para pór en común a actividade que están a desenvolver os outros coworkers e crear posíbeis sinerxías entre persoas usuarias do espazo e levar a cabo actividades e proxectos en común.
Alén disto, planificáronse actividades de dinamización e promoción do espazo para este ano 2026 eque contan coa colaboración dos proxectos emprendedores albergados no espazo. “Cada vez máis este centro estase a converter nun lugar de referencia para o emprego e o emprendemento e queremos seguir desenvolvendo propostas e actividades que contribúan á xeración de emprego”, afirmou o alcalde.
O espazo coworking Lab Barbanza do Concello de Boiro forma parte da Rede de Espazos de traballo colaborativo da Deputación da Coruña. Atópase no Centro de Formación, Innovación, Emprego e Emprendemento do Concello de Boiro, no Polígono de Espiñeira.
