O Consorcio de Santiago e a Universidade de Santiago de Compostela (USC) presentaron este martes 24 de febreiro no Museo do Pobo Galego o libro “Lembranzas a escena. Un labor teatral (Santiago de Compostela, 1958-1967)”, obra de Ezequiel Méndez Vidal.
No acto participaron a alcaldesa de Santiago e presidenta do Consorcio, Goretti Sanmartín Rei; o reitor da USC, Antonio López Díaz; a presidenta do padroado do Museo do Pobo Galego, Concepción Losada Vázquez; o xerente do Consorcio, José Antonio Domínguez Varela; así como os responsables de publicacións da USC e do Consorcio, Juan Blanco Valdés e Juan Conde Roa. O historiador Ricardo Gurriarán Rodríguez leu un texto remitido polo autor para a ocasión. Tamén asistiron o delegado do Goberno en Galicia, Pedro Blanco Lobeiras, e o secretario xeral da Lingua, Valentín García Gómez.
Memoria cultural nun tempo de restricións
A obra recolle as detalladas memorias do intenso labor de interpretación e dirección teatral desenvolvido por Méndez Vidal no ámbito universitario compostelán entre 1958 e 1967, nun contexto marcado polas limitacións políticas do tardofranquismo. Naqueles anos, calquera actividade cultural que excedese os estreitos marxes da ditadura era observada con desconfianza e, en ocasións, cualificada de “subversiva”.
O libro pretende render homenaxe ao compromiso dunha xeración que, a través do teatro universitario, o Cine Club Universitario ou o proxecto audiovisual Equipo 64, contribuíu a construír espazos de liberdade cultural en tempos complexos.
Entre os episodios que rememora destaca a estrea en Galicia de “Os vellos non deben namorarse”, de Castelao, representada na Praza da Quintana o 25 de xullo de 1961, na que o propio autor participou no papel do boticario Saturio.
Un retrato do dinamismo compostelán
Durante a presentación, Goretti Sanmartín salientou que a publicación permite coñecer o dinamismo cultural do Santiago universitario da época e recuperar un período no que o compromiso cívico e a creación artística floreceron malia as restricións. A obra documenta tamén a presenza de figuras como Benito Varela Jácome, Avelino Abuín de Tembra ou Pilar Pereira, e lembra fitos fundamentais da vida cultural compostelá.
Licenciado en Filosofía e Letras pola USC, Méndez Vidal fundou en 1961 o Cine Club Universitario e desenvolveu unha longa traxectoria como crítico cinematográfico en xornais como La Noche e El Correo Gallego, dirixidos daquela por Raimundo García Domínguez, Borobó. Posteriormente, ocupou cargos de responsabilidade en editoriais como Fondo de Cultura Económica, Alianza Editorial ou no Instituto Cervantes.
Dende 2007 reside en Madrid, onde goza da xubilación. En 2024 foi nomeado Fillo Predilecto polo Concello de Santiago de Compostela, recoñecemento que subliña a pegada cultural dun autor que agora ve recollida en libro a memoria dun tempo clave para o teatro universitario galego.
