Coa mirada posta na chegada do bo tempo, o Concello de Dodro presenta unha completa listaxe de roteiros de lecer pensada para gozar da natureza, descubrir novas paisaxes e tesouros patrimoniais e compartir bos momentos en grupo. Trátase do Programa de Sendeirismo 2026 do Concello de Dodro. Inclúe catro rutas durante os meses de abril, maio e xuño, en contornas naturais de gran beleza. Será, en palabras do Concello, “unha oportunidade perfecta para activar corpo e mente mentres exploramos camiños únicos da nosa comunidade”.
O programa susténtase sobre as moitas vantaxes e beneficios do sendeirismo: mellora da saúde cardiovascular, fortalecemento muscular e das articulacións, redución do estrés e mellora do estado de ánimo, contacto coa natureza e desconexión dixital e fomento das relacións sociais e do compañeirismo. Ademais, sinala o Concello, “o sendeirismo é unha actividade accesíbel, saudábel e perfecta para todas as idades”.
Neste intre está aberto o proceso de preinscrición para todas aquelas persoas interesadas en participar. As prazas son limitadas.
Para formalizar a preinscrición podemos contactar co Departamento de Deportes sito no Pavillón Polideportivo Municipal. 981.80.25.32 / 689.897.223 / deportes@dodro.gal.
