O CEIP Plurilingüe Campanario de Baroña (Porto do Son) e o CEP Xosé María Brea Segade de Taragoña (Rianxo) veñen de ser recoñecidos co Primeiro e o Terceiro Premio Innovagal da Consellería de Educación, respectivamente, galardóns que poñen en valor a creatividade e o talento innovador do seu alumnado e que serán comunicados en breve, oficialmente, pola Xunta de Galicia.
O primeiro premio, que distingue á comunidade escolar e docente do CEIP de Baroña, está dotado con 10.000 euros e o terceiro, o que vai dar ao CEP Brea Segade, con 3.000 euros.
Estes galardóns recoñecen o compromiso dos nosos centros escolares coa innovación e as boas prácticas en educación, impulsando o desenvolvemento de novas propostas educativas e fomentando a creación dunha rede de colaboración para fomentar a formación continua do profesorado. Ademais, a Consellería de Educación, Ciencia, Universidades e FP pretende poñer en valor o papel da comunidade educativa como motor de transformación social.
Segundo informou o propio centro de Baroña nas redes sociais, “as nosas nenas e nenos son os verdadeiros protagonistas deste logro: persoas creativas, solidarias, curiosas e comprometidas, que cada día demostran que aprender tamén é colaborar, respectar e soñar en grande”.
Este premio, engaden, “reflicte o traballo das nosas nenas e nenos, a súa implicación e as ganas de mellorar, acompañados sempre polo profesorado e co apoio incondicional das familias e da Comunidade de Montes de Baroña que cada día apostan por unha educación innovadora nunha escola rural”.
