Dende o pasado 6 de febreiro Renfe cortou o tramo da vía de ferrocarril convencional entre Santiago e Vilagarcía, o que ocasionou que os viaxeiros e viaxeiras das estacións de Catoira, Matanza, Pontecesures e Osebe, fiquen sen tren afectando potencialmente a esas persoas que usan o tren para traballar ou estudar, deixando unha vez máis, ás comarcas do Sar e do Barbanza.
Dende o BNG cuestionan que o peche da liña sexa a única resposta ante os episodios de fortes chuvias e reclaman mellores tarefas de inspección e mantemento por parte de Renfe e Adif para garantir a seguridade sen interromper o servizo. Tamén critican “a deficiente organización do transporte alternativo por estrada, con atrasos e supresións, así como a falta de información clara por parte de Renfe, que mesmo continuou vendendo billetes de tren cando o servizo estaba cancelado”.
Deste xeito, o deputado no Congreso dos Deputados, Néstor Rego, formulou unha batería de preguntas dirixidas ao Goberno relativa a este problema para axilizar a apertura desta liña con todas as garantías.
