O Bloque Nacionalista Galego (BNG) vén de rexistrar no Parlamento de Galicia unha Proposición non de lei coa que reclama ao Goberno galego que asuma as súas responsabilidades e acometa o arranxo integral da estación de autobuses da Pobra do Caramiñal, que cualifica de “abandonada” e en “estado deplorábel”.
A iniciativa, presentada pola deputada Rosana Pérez, denuncia a situación de deterioro e falta de servizos destas instalacións, de titularidade autonómica. A estación, inaugurada no ano 2002 cun investimento superior aos 300.000 euros, contaba inicialmente con cafetaría, zona de agarda, catro andéns e catro taquillas de billetes.
Segundo a portavoz municipal do BNG, Amparo Cerecedo, o servizo sufriu un “deterioro progresivo” pola falta de mantemento da Xunta: “Non só non se realizaron melloras, senón que o propio Concello tivo que facerse cargo de tarefas básicas como a limpeza do recinto”, sinalou. Actualmente, o interior do edificio permanece pechado desde hai anos, a cafetaría deixou de funcionar e as persoas usuarias carecen de acceso a servizos básicos, malia estar situada en pleno centro urbano.
Co propósito de reverter esta situación, o BNG presentou unha emenda aos Orzamentos da Xunta para 2026 na que propoñía unha partida de 300.000 euros para a rehabilitación total da estación e a recuperación dos seus servizos, pero a proposta foi rexeitada polo Partido Popular, o que os nacionalistas interpretan como unha mostra de “desinterese pola mellora das infraestruturas públicas”.
Rosana Pérez instou o Executivo galego a “abandonar o desleixo” e asumir a xestión, mantemento, limpeza, iluminación e posta en funcionamento da estación, poñendo todos os espazos e servizos ao dispor da cidadanía.
Pola súa parte, o responsábel comarcal de Galiza Nova, David Casais, aproveitou para denunciar tamén o estado xeral do transporte público na comarca do Barbanza. Reclamou un aumento de liñas que conecten as parroquias rurais e melloren a vertebración da comarca co resto do país. Casais lembrou que no 2024 a organización xuvenil recolleu 2.000 sinaturas para reforzar a conexión ferroviaria e coas provincias veciñas, proposta que —asegura— “foi rexeitada polo PP ao considerar que non era necesaria”.
