O vindeiro martes 3 de marzo, ás 19.30 horas, o Auditorio de Rianxo será escenario dunha charla informativa sobre o programa Vacacións en Paz, unha iniciativa solidaria que promove o acollemento temporal de nenos e nenas saharauís por parte de familias galegas durante os meses de xullo e agosto.
O encontro está organizado pola Asociación Galega de Solidariedade co Pobo Saharauí, entidade encargada de coordinar e xestionar o programa en Galicia, que fai un chamamento á cidadanía para incorporar novas familias de acollida de cara ao vindeiro verán.
Na comarca do Barbanza, o pasado ano participaron no programa un total de 18 nenos e nenas saharauís, unha cifra que a organización agarda poder incrementar nesta nova edición.
Entre os principais obxectivos de Vacacións en Paz figuran evitar as extremas temperaturas que se rexistran nos campamentos de refuxiados durante o verán, facilitar revisións médicas e asistencia sanitaria, garantir unha alimentación equilibrada e saudable, así como sensibilizar á sociedade galega sobre a realidade do pobo saharauí e a necesidade de avanzar cara a unha solución xusta e definitiva para o seu conflito.
A charla está aberta a todas aquelas persoas interesadas en coñecer máis detalles sobre o programa e sobre o proceso de acollemento.
