A compañía catalá Cía. MeLaBuffa chega a Muros co espectáculo familiar El professor Bromera. A proposta combina monicreques, conto e burbullas nun espectáculo pensado para público infantil e familiar. A función terá lugar este sábado, 7 de febreiro, ás 18.00 horas no Auditorio do Centro Cultural e Xuvenil de Muros
Segundo relata o Concello, El professor Bromera é unha proposta de monicreques e burbullas dirixida a nenos e nenas a partir de 3 anos.
Nun laboratorio cheo de luz e misterio, un científico entrañábel convida a descubrir un mundo invisible onde a auga e o xabón crean formas sorprendentes. A través dun conto con voces e monicreques, o público participa nunha experiencia colectiva chea de imaxinación, xogo e poesía visual.
A concelleira de Cultura, Caridad González Cerviño, destacou que estamos ante “un espectáculo pensado para compartir en familia, que combina diversión e creatividade cunha linguaxe visual moi coidada”. “Dende a Concellería seguimos apostando por achegar propostas de calidade ao público infantil e familiar, favorecendo o acceso á cultura desde as primeiras idades”, engadiu.
A función terá unha duración aproximada de 55 minutos e o prezo da entrada será de 3 euros.
As entradas están dispoñíbeis na billeteira electrónica do Concello de Muros e nas oficinas do Centro Cultural e Xuvenil de Muros
