O Concello de Noia presentou o programa de actividades con motivo do 8 de Marzo, Día Internacional da Muller, cunha proposta ampla e diversa pensada para implicar a toda a veciñanza, dende a infancia ata as persoas maiores, combinando sensibilización, cultura e recoñecemento histórico.
A concelleira de Igualdade, Chelo Martínez, salientou que “este 8M está deseñado para que toda a veciñanza poida participar, dende a infancia ata as persoas maiores, porque a igualdade constrúese colectivamente e require da implicación de toda a sociedade”.
Homenaxe ás mulleres do mar
Un dos eixos centrais da programación será o recoñecemento ás mulleres do mar, cun dobre acto de especial simbolismo: o nomeamento do Museo do Mar de Noia como “Museo do Mar Carmen Barcia” e da prazoleta do Paseo Marítimo como “Praza das Mariscadoras”.
Segundo explicou Martínez, “trátase dun acto de xustiza e de memoria. As mariscadoras e as mulleres do mar forman parte esencial da historia económica e social de Noia, e era necesario visibilizar e dignificar o seu legado”.
Estes actos estarán acompañados polo roteiro “A memoria das mulleres”, unha actividade que permitirá contextualizar historicamente os novos espazos públicos e afondar no papel feminino na historia local.
Actividades para todas as idades
O programa inclúe actividades educativas dirixidas ao alumnado de Primaria, accións de sensibilización orientadas á mocidade e a instalación dun stand informativo sobre violencia sexual, reforzando así a vertente formativa e preventiva da campaña.
A programación cultural ocupará tamén un lugar destacado, con representación teatral, a proxección do filme Suffragette (Sufraxistas) e a celebración dunha Xornada pola Igualdade que combinará obradoiros e música en directo nun ambiente aberto e interxeracional.
Esta xornada contará con actividades para nenos e maiores, así como coa participación das DJ “DJ RAPARIGA” e “DJ YAYA”. En palabras da concelleira de Igualdade, “dá bo reflexo do que busca ser esta edición do 8M en Noia, unha programación enfocada a todas as idades, onde ninguén queda excluída”.
“Queremos que este 8M sexa un espazo de encontro, reflexión e tamén celebración do camiño avanzado, sen esquecer todo o que queda por facer”, sinalou Martínez, animando á veciñanza a participar activamente nas actividades.
Desde o Concello subliñan que esta programación supón unha nova mostra do compromiso institucional coa igualdade real e efectiva, reforzando a memoria colectiva e promovendo valores de respecto, xustiza e corresponsabilidade.
