O Concello de Noia investiu un total de 60.000 euros na mellora das instalacións do Campo de Fútbol Julio Mato “Matito”, nunha actuación destinada a modernizar o recinto e garantir unha práctica deportiva máis segura, eficiente e acorde ás necesidades actuais de clubs e usuarios.
A intervención máis relevante foi a instalación dunha nova bomba de aerotermia, un sistema enerxeticamente eficiente que permitirá reducir de maneira considerable o consumo eléctrico da instalación. O custo desta actuación ascendeu a 44.000 euros, dos que 11.000 euros foron subvencionados pola Xunta de Galicia a través dunha liña de axudas do INEGA financiada con fondos europeos.
Ademais da renovación do sistema enerxético, executáronse labores de impermeabilización nun dos elementos cubertos do campo co obxectivo de evitar filtracións e mellorar a conservación da infraestrutura. Tamén se solucionaron os problemas detectados no subministro de auga quente nos vestiarios anexos, onde se acometeron diversas reparacións para optimizar o seu estado e funcionalidade.
Por outra banda, levouse a cabo unha limpeza integral das pistas de atletismo, que presentaban unha importante acumulación de sucidade e supoñían un risco para os e as atletas que empregan estas instalacións nos seus adestramentos habituais.
Desde o goberno local destacan que estas actuacións responden ao compromiso municipal coa mellora continua das infraestruturas deportivas, co fin de ofrecer condicións axeitadas para clubs, deportistas e veciñanza en xeral.
Con esta intervención, o Concello confía en que o Campo Julio Mato “Matito” conte desde agora con instalacións máis eficientes, seguras e dignas
