O Concello de Noia iniciará no exercicio 2026 un Plan Económico-Financeiro co obxectivo de reforzar a estabilidade das contas municipais, tras completar un proceso de revisión e regularización contable que permitiu incorporar facturas pendentes de exercicios anteriores, principalmente correspondentes aos anos 2022, 2023 e 2024.
Segundo informa o goberno local, durante os meses de xullo e agosto de 2025 rexistrouse un volume extraordinario de facturas sen consignación orzamentaria que supera o millón de euros. Esta regularización, orientada a garantir o pagamento aos provedores e a reflectir con transparencia a situación económica real da administración, supuxo a superación da regra de gasto establecida pola normativa vixente para o exercicio 2025.
O actual executivo municipal, constituído tras a moción de censura do pasado 11 de agosto de 2026, puxo en marcha desde o primeiro momento un plan de revisión económica e control do gasto co fin de ordenar a situación financeira e establecer unha base sólida para os vindeiros exercicios.
O concelleiro de Facenda, Manolo Seijas, destacou que “en só catro meses levouse a cabo un intenso traballo de análise e regularización que permitiu coñecer con rigor a realidade económica do Concello. Dende setembro xa se contemplaba a necesidade de acudir a un Plan Económico-Financeiro como ferramenta técnica para garantir o pagamento aos provedores e reforzar a estabilidade financeira”.
Aínda que formalmente o Plan Económico-Financeiro iniciarase no exercicio 2026, o goberno municipal xa adoptou medidas orientadas á redución do gasto corrente, á mellora da planificación orzamentaria e á racionalización da xestión económica.
Desde o Concello subliñan que esta decisión reafirma o compromiso coa transparencia, coa responsabilidade na xestión dos fondos públicos e coa adopción das medidas necesarias para asegurar a sustentabilidade económica da administración local.
