A Xunta anunciou esta semana pasada o trámite de información pública do proxecto da nova senda peonil e ciclista, de máis de 2 quilómetros, entre o núcleo de Viro e Outes, que suporá un investimento de 1,4M€. Así o detallou a conselleira de Vivenda e Planificación de Infraestruturas, María Martínez Allegue, que se achegou a este municipio xunto coa directora da Axencia Galega de Infraestruturas, María Deza, acompañadas polo alcalde Francisco Calo.
A conselleira apuntou que a Xunta prevé aprobar o proxecto no primeiro semestre deste ano e licitar despois do verán as obras, que van ter un prazo de 12 meses, polo que o obxectivo é “que a senda estea rematada a finais do vindeiro ano”.
Sinalou que se trata dun novo itinerario peonil e ciclista de 2,3 quilómetros na estrada AC-550, que será co-financiado con Fondos FEDER.
Indicou que o itinerario unirá o núcleo rural de Viro e o centro urbano da Serra de Outes, e conectará coas beirarrúas existentes nos extremos.
De xeito máis concreto, a senda acometerase no treito desta vía autonómica comprendido entre os puntos quilométricos 62+120 a 64+410.
Destacou que con esta actuación “dáse resposta a unha demanda da veciñanza desta área, xa que esta estrada conta cunha elevada intensidade de tráfico, 4.000 vehículos diarios”.
Remarcou que o obxectivo da intervención é “facilitar desprazamentos cómodos e seguros, camiñando ou en bicicleta, para a veciñanza, especialmente do Viro, e para os visitantes”.
Lembrou que a obra enmárcase na 2ª fase do Plan de Sendas da Xunta, que “permitirá desenvolver 120 km itinerarios seguros e sostíbeis nas marxes das estradas autonómicas”. Estas sendas, dixo, “sumaranse á rede de máis de 300 km xa executados polo Goberno galego nos últimos anos”.
